श्रीमद्भास्कराचार्यविरचितस्य सिद्धान्तशिरोमणिग्रन्थस्य ग्रहगणिताध्यायान्तर्गतानां पर्वसम्भव-चन्द्रग्रहण-सूर्यग्रहणाधिकाराणां समीक्षात्मकमध्ययनम्

"प्रत्यक्षं ज्यौतिषं शास्त्रं चन्द्रार्कौ यत्र साक्षिणौ" इति उक्तेः सार्थक्यं ग्रहणगणितद्वारा एव भवति । प्रायः सर्वेष्वपि भारतीयखगोलग्रन्थेषु ग्रहणगणितं वर्तते एव । भारतीयखगोलग्रन्थेषु भास्कराचार्य इति नाम्ना प्रसिद्धेन द्वितीयभास्करेण विरचितः सिद्धान्तशिरोमणिग्रन्थः अन्यतमः । "श्रीमद्भास्कराचार्यविरचितस्य सिद्धान्तशिरोमणिग्रन्थस्य ग्रहगणिताध्यायान्तर्गतानां पर्वसम्भव-चन्द्रग्रहण-सूर्यग्रहणाधिकाराणां समीक्षात्मकमध्ययनम्" इति शीर्षकोपेते शोधग्रन्थेऽस्मिन् सिद्धान्तशिरोमणिग्रन्थस्य ग्रहगणिताध्यायान्तर्गतानां पर्वसम्भव-चन्द्रग्रहण-सूर्यग्रहणाधिकाराणां समीक्षात्मकमध्ययनं विहितम् । ग्रन्थोऽयं पञ्चसु अध्यायेषु उपनिबद्धः । ग्रन्थेऽस्मिन्सिद्धान्तशिरोमणिग्रन्थस्य ग्रन्थकारस्य च स्थूलपरिचयः, वैज्ञानिकदृष्ट्या ग्रहणस्य स्थूलपरिचयः, ग्रहणसम्भावनाज्ञानं, रविचन्द्रभूभानां बिम्बमानसाधनं, चन्द्रशरसाधनं, स्थित्यर्धमर्दार्धयोः‌ साधनं, स्पर्शादिमासानां साधनं, वलनगणितं, ग्रहणे परिलेखविधिः, ग्रासप्रमाणभेदात् ग्राह्यबिम्बस्य वर्णभेदः, अनादेश्यग्रहणं, सूर्यग्रहणे लम्बननत्योः साधनम् इत्येते विचाराः, तेषाम् उपपत्तयश्च चित्रैः समीकरणैश्च सह प्रतिपादिताः । सरलसंस्कृतभाषायां निबद्धोऽयं ग्रन्थः संस्कृतच्छात्राणां कृते, विशिष्य सिद्धान्तज्यौतिषस्य छात्राणां कृते अध्ययनाय अतीव उपयोगी भवति ।